رسالة من طبيب لبناني الى الرئيس عون: "البيّن كأنّك استسلمت للمنصب مش للتغيير"!
شارك هذا الخبر
Monday, August 3, 2020
كتب الطبيب في مستشفى الجامعة الاميركية نبيل كنعان ما يلي:
"فخامة الرئيس .. اسمح لي ما وافق معك هالمرة كمان ..
أولاً .. يمكن كنت إبن المؤسسة العسكرية لحد أواسط الثمانينات تقريباً ... وبعدين صرت بيّها .. .وضليت بيّها ليوم ١٣ تشرين .. بس حالياً انت "بي الكل"... يعني مفترض تكون بي الشعب والعسكر والكل ...
وثانياً يا فخامة الرئيس .. لا تواخذني بموضوع الاستسلام ... حضرتك استسلمت للجيش السوري لما هاجم قصر بعبدا وسلّمت القيادة لإميل لحود وانت بالبيجاما .. مع إنك قبل بكم ساعة كنت صرحت إنّو ميشال عون آخر واحد بيترك موقعه ..
حضرتك استسلمت وغيّرت مبادئ علمتنا عليها على مدى سنين وعطيتنا الأمل بالتغيير لما صادقت النظام يللي دفن ولادك الضباط والجنود أحياء وعملت تفاهم غير مفهوم مع فصيل مسلّح هلكتنا انت ومنفي انو غير شرعي وتحت سلطة إيرانية وما بعرف شو ...
كمان حضرتك استسلمت لتفاهمات مضحكة مع سعد الحريري وسمير جعجع بس لتوصل لرئاسة الجمهورية .. مع انك عارف انو صلاحيات الرئاسة محدودة ... وبيّن كأنّك استسلمت للمنصب مش للتغيير ...
وكمان لما صرت رئيس استسلمت كليّاً لمافيات الفساد والعهر السياسي وكارتلات السرقة ووعدت الناس بالإصلاح والتغيير بس يللي بيّن هو استسلامك الكامل لآراء صهرك العزيز صاحب أكبر فضايح العصر اللبناني الحديث وأكبر هدر مالي بالطاقة والسدود والبيئة وتقريباً بكل شي ...
اذا بدنا نعدّ كم مرة استسلمت يا فخامة الرئيس.. متل ما غنّى جورج وسوف ...منتوه بالعدّ...
بشكر كل يللي بيقولولي وبيتمنولي انو الله يحميني ... وبقول للجميع: ما ضاع حقّ وراءه مطالب ... وصاحب الحق سلطان ..."
