بعضكم ما زالوا فوقيين "وغربيين" و"لغات"، و"مجد لبنان اعطي لبكركي" ، و"البلد ما بيمشي بدونهم" .. والكون بيخرب بدون الارزة..ووو. بالله عليكم؟ شو استفدتم ان رئيس الجمهورية ماروني، بصلاحية الملكة اليزابيت. حق فيتو مؤقت؟ كان فؤاد شهاب في مفهومه للدولة استثنائيا. ماذا عن قبله وبعده. شو استفدتم من حاكم بنك مركزي ماروني فاسد بيدافع عنه البطريرك ،والصحافة والصحابة الماجورة، بما فيها القضاء الاعلى الماروني، وأخرج اموال الزعماء، بغض النظر عن طوائفهم. وهندس تبخر الودائع بما فيها المارونية. شو استفدتم من قادة جيش سابقين موارنة، ومنهم عمل رئيس جمهورية، خرجوا من القيادة بسيارات سبور ومئات الملايين من الدولارات. وما بتتخلوا عن رئاسة الجمهورية؟ .... ابدا... وكل واحد منكم مستعد يعمل مجزرة مرة تانية وتالتة متل ما عملتوا بالماضي، ويبيع نفسه لسفارة حتى جزر الموز، ليعمل رئيس جمهورية.. العمى. على شو؟ بحجة الحفاظ على الوجود في هذا الشرق؟ يعني هل شفتو رئيس جمهورية ماروني، مستعد يقاتل الدنيا، للحفاظ على الوجود الماروني، ام كان همهم زعامتهم. مش شايفين كيف الكل عم يهاجر، وياخذ جنسيات برا، وعم يتم تجنيس غرباء جوا؟ خلوا الرئاسة معكم بشرفكم؟ وخلوا الحاكم المركزي ورئيس مجلس القضاء. اوعوا تتخلوا. بس اسالوا حالكم: مين عم يضحك بعبه وفي داخله. مش رؤساء الخكومة ورئيس مجلس النواب؟ وهم شركاء من؟ مش شركاء كل الموارنة اللي اجوا وعم يجوا على الحكم والسلطة والمناصب؟
يعني يا موارنة ما تزعلوا. طلعتوا انتو منكم أذكى من غيركم متل ما كنتم وكنا مفكرين، ولو حكيتوا كم كلمة اجنبي قبل غيركم. ولو كنتم أذكياء لطالبتوا برئاسة الحكومة، او حتى رئاسة المجلس. لمعلوماتكم اغلب الموارنة بيهادنوا رئيس المجلس لانو ببنده له: فخامة الرئيس... بيصير نعامة. انتم متل اولاد الطوائف الاخرى، وأسوأ. بتتحمسوا وبتتعصبوا وبتهدوا وبتقدوا لتتمسكوا بزعماء يوصلوا على مراكز مارونية برعاية بكركي دوما، حتى يتشاركوا بالفساد مع زعماء سنة وشيعة ودروز، وبرعاية دار الافتاء والمجلس الاسلامي الشيعي الاعلى ودار العقل الدرزي..والسلطة الفعلية مش معكم، بل مع الاخرين.. ومتمسكين بالتعصب ،وما بترضوا وبترضوا... صحتين. ما حدا عم يعترض عليكم، وكل انتخابات بتصير معركة وهمية، يتدخل فيها بكل "ذكاء"، دول العالم، وبيحتمع البطريرك مع سفراء، وبتشتغل مخابرات ٨ او ٩ دول بين بعضها؟ بس فهمونا.. على شو؟ شو استفدتوا، وشو استفاد لبنان ومجد لبنان..
النتيجة. طلعتوا يا موارنة مش اذكى من غيركم. قلبكم طيب متل أبناء باقي الطوائف، حتى ما نقول كلمة تانية.
الكل غنم طوائف وراء زعماء منافقين دين ودنيا، ما ببعرفوا الله، عشتم وعاش لبنان..
نظام فاشل لشعب فاشل، يحكمه عصابة منظمة، برعاية المجتمع الدولي..
وصفه جبران خليل جبران، الماروني (اللي رجعوا تذكروه الموارنة بعد ما اكتشف عبقريته الغرب)، بعد ما قرف وهاجر: "ويل لامة مقسمة الى أجزاء يحسب كل جزء فيه نفسه امة" .. اعطيني يا صفية حبة دوا. كل ما بكتب عن لبنان بتلعي نفسي... ليش؟ لانو كل يوم بتأكد انو بنكتب نفش خلقنا. الناس مشغولة على العشاء الليلة..
