الإعلامية باتريسيا سماحة - ايه قصتنا ما خلصت...قصتنا هلق بلشت
شارك هذا الخبر
Wednesday, April 7, 2021
وقت بتسال طفل ليش لازم البابا يزور لبنان ويكون الجواب لانو عايزين امان يعني الوجع كبير ، بكون الوجع اكبر من عمر الثماني سنين واكبر من لعبة بتغني وبترقص ، واكبر من فستان زهر ....بكون الطفل خايف ع مستقبل وع وطن وع حلم ....وبس يقلك طفل بلبنان في انفجارات يعني عم يسمع متلو متلك اخبار ، وعم يعتل هم وعم ينقهر وعم يزعل ....وبس بجواب واحد يخبرك عن شي وجعو ويحكي عن الكساندرا الصغيرة يلي قتلها الانفجار ،يعني الطفل وجعو غياب هالملاك الصغير وسأل حالو لوين راحت ، كيف قدرت تترك امها وبيها واصحابها وحياتها ولعبها وتروح ويرجع يقلك بس فكرت انو صارت ملاك بالسما الجواب حمل وجع وايمان ونضال ....هودي اطفالنا هودي همومن ، كبرتوهم قبل عمرهم ولادنا بيعتلو هم الدولار والبنك والوضع الاقتصادي والمدرسة والوضع الامني ، بخافوا ما نرجع من بعد الشغل لان طريقنا من حد المرفأ ، بخافوا ما يضل فينا نشتري من السوبرماركت لان بيسمعونا عمً نحكي عن غلا الاسعار ...بخافوا من ًكل شي بوقت ولاد العالم كلو عم يحلمو ببكرا .....انتو مجرمين ونحنا قصتنا ما خلصت
من سنتين وعلى عيد البشارة العيد الوطني الجامع ست اطفال وجهوا رسائل للعالم كلو باسم المنتدى العالمي للاديان والانسانية ، رسائل فيها من البراءة والصدق والحقيقة اكتر بكتير من كل المؤتمرات واللقاءات والشعارات ... ومن ضمن هالرسائل ،رسالة توجهت فيها طفلة صغيرة للبابا وشاءت الاقدار انو توصل الرسالة لايد البابا بقلب الطيارة بالمغرب وعرفنا من وسائل اعلام ايطالية انو البابا تفاعل مع الرسالة يلي كتبتها كريستابيل بخط ايدها ورسمت عليها قلوب زهر وكتبتلو بحبك يا بابا فرنسيس البابا رح يزور لبنان ولبنان ما رح يموت.
