كلمات مؤثرة من ديفيد إلى شقيقه الشهيد رالف ملاحي: أنا بعدني ناطرك يا خيّي
شارك هذا الخبر
Saturday, December 5, 2020
أشهر مرت على انفجار بيروت والاعياد على الابواب ولكن "عيد بأية حال عدت يا عيد" وهو يحمل معه غصة في قلب من فقد الأحباء والغوالي. نشر شقيق الشهيد رالف ملاحي، دايفيد ملاحي ، على حسابه عبر "انستغرام" صورة لشقيقه الشاب، وكتب:
"صاروا ٤ شهور يا خيّي.
صاروا ٤ شهور يا خيّي مش سامع صوتك...
صاروا ٤ شهور يا خيّي مش شايف شكلك وعيونك يلّي يقبروا قلبي من لون السما...
صاروا ٤ شهور يا خيّي مش شامم ريحتك...
آخ يا رورو والله بعدنا بحلم مش مصدقين...
قرّب العيد وانت هالسنة مش معنا يا خيّي، عم صلّي ما يجي هالنهار كرمال ما نوعى عالحقيقة المرة وإنو نحنا مش ب حلم !
إمّك، بيّك، إختك وعمتك إهتروا عيونن من البكي ...
وأنا بعدني ناطرك يا خيّي
لا عم نعرف ناكل ولا نحكي ولا عم نعرف نضحك ولا عم نعرف نعمل شي، وصورتك ما عم تفارقنا يا خيّي...
بفتخر قدّام كل العالم بس حدا يعيّطلي "رالف" بالغلط أو يقلّي خيّو للبطل الشهيد "رالف" لأنو صدِّق يا تقبرني انت وإخواتك التسعة .. الوحيدين يلّي جرّبتوا تعملوا شي بهالبلد! نزلتوا كرمال اتطفّوا حريق، قاموا حرقولنا قلبنا يا خيّي على فراقكن...
بطلب منّك يا خيّي القديس، بس تردّلن ولادن ل يلّي كانوا السبب ... مشقفين ومش باقي منن لا شقفة ولا عضمة.
آخر شي يا خيّي بدّي قلّك انت كنت
عيوني وقلبي وروحي ونقطة ضعفي ورح تضلّ هيك لآخر ثانية من عمري يا قلب قلبي انت...".
