رسالة من المحامي ربيع معلوف للرئيس عون... هذا ما جاء فيها
شارك هذا الخبر
Saturday, November 21, 2020
فخامة الرئيس، سنة ١٩٨٩ حملني الوالد وطلع فينا على قصر بعبدا مع صورة عملاقة للجنرال، رقصنا وغنينا على اغاني وشعارات وعونك جاي من الله. وقتها كلنا قلنا انك عون للبنان وجاي من الله كرمال تخلصنا. تعلمت وتخرجت واصريت اخدم خدمة العلم حبا للجيش يلي انت علمتنا نحبه. ناضلت بالتيار وقدمت الكتير دون أي تربيح جميلة أو طمعا بمركز معين، لا بل كانت المراكز تطلبني للخدمة والثقة، بالمقابل كانوا كتار يخافوا يلبسوا orange او يحضروا اجتماع هودي هني ذاتن صاروا هلق مسؤولين بالتيار بحجة الاستفادة من العهد. وقت تعلقنا فيك يا جنرال شفنا فيك المخلص وكنا نطلع على الرابية كرمال ناخد أمل بمستقبل لبنان يلي انت وعدتنا رح يكون أفضل وانو كل فاسد عندك الو ملف وجاي نهار ينكشف المستور. في كتير من الأوقات ما كنا نوافق على قراراتك بس كان عنا ايمان انو شو ما قرر الجنرال معه حق ودايما على حق. تحدينا كتير ناس واختلفنا مع اقرب المقربين كرمال نحافظ على المبادئ يلي ربيتنا عليها. من بعد ما صرت فخامة الرئيس كل شي تغير وما عاد مسموح نشوفك غير بإذن من التيارين الجدد يلي بيعرفوا كل شي الا مبادئ التيار يلي تربينا عليها. صار الفاسد لازم نقدم دليل على فساده ونعدل القوانين كرمال يتحاسب، وصار الإنجاز للعهد بجسر جل الديب وموازنة وقطع حساب، وصار العهد القوي ضعيف بالشعبية، وصاروا زوار القصر كم مستشار وكم نايب محددين. وصارت حجة الفشل انو ما خلونا، بالوقت يلي علمتنا انو ما في شي مستحيل وانو الفشل ممنوع والسكوت عن الحقيقة جريمة. وقت قررت اترك التيار تركت عن حزن متلي متل كتار تركوا، اوعا تفكر تركنا نحنا ومبسوطين، تركنا لأنو ما عاد الجو يشبهنا ولا التيار تيارنا. وبالرغم من ترك التيار ما بنكر انو عندي حنين لأيام الرابية وأيام جنرال الرابية وأيام الوعود والأمل والعنفوان والاخوة، بعد في أمل يا جنرال لبنان بيسقط بس ما بموت، ما تخلي لبنان يموت بعهدك، انتفض وشيل الغبار عن ٤ سنين من عهدك، إرجاع جنرال الرابية وحققلنا ١٠ بالمئة من وعودك، هيك منحس انو في جزء من احلامنا تحققت مش كل احلامنا اندفنت. بكل محبة واحترام فخامة الرئيس المحامي ربيع معلوف
