"نادين جوني" ماما... كرم... بتتذكر يا إبني نهار يلي كان عمرك كم يوم... وإجا بيَّك أخدك من بين إيديي... وفل؟ كنت عايشة عمري عأمل شوفك... اليوم غمضت عيوني عالدني ... وبعيوني من فوق... كل الوقت رح شوفك... كنت عايشة عمري رايحة جايي عالمظاهرات... لحتى حس إنك ممكن ترجع بين إيديي... واليوم السما عيَّطتلي عطريقي تإتظاهر... فوق بياخدولي حقي أكتر من هون... كنت عايشة عمري... عم بتخايل شكلك اول نهار مدرسة... اليوم رح شوفك قدّي كبِرت... وبروحي رح رافقك عالمدرسة وإنطرك لتخلص... وردّك عالبيت... وأغمرك لتخلص الدني... كنت عايشة عمري... عم نام وفيق... عم بسرق عمر تإلمحك... اليوم نمت النومة الأبدية... سرقني العمر تإربحك... كنت عايشة عمري عم بصرخ بوجه الظلم صرخات إم موجوعة... اليوم صرختي الأبدية رح تبقى بضميرن... حتى ما يبقى في إم موجوعة...
كرم... تعا يا إمي... زورني بمدفني... واغمرني... تعا يا إمي... وقول لحفار القبور... هون اندفنت إمي... رِدني عرحمها... حتى ما حدا ياخدني منها... وما حدا ياخدها... مني...
