الناشط جورج يونس: "هلقد بحبك يا لبنان"
شارك هذا الخبر

Thursday, November 08, 2018

كتب الناشط الاجتماعي جورج يونس على صفحته عبر موقع فيسبوك ما يلي:

"مش مقبول اللي عم بصير!

حفلة جنون وفلتانة، والله بالعصفورية مش هيك!

لا القيم ولا المبادئ ولا التراث ولا التاريخ ولا الشرف ولا الضمير بقى إلهم معنى.

وفوق كل اللي عم يعملوا فينا، بربحونا جميلة بالإنجازات وبيصرخوا فينا "سكتوااااا"!

كيف وبأي قاموس بيقروا؟

هلق صارت الإنجازات بقطع الكهربا وتركيب العدادات وخلق الأزمات وقطع الأنفاس وتسكير الشركات وملاحقة الأحرار والأوادم وزيادة الهجرة؟

أو الإنجازات بالمناكفات والمحاصصة وإخبار الناس إنو الدوا بتركيا ومصر و واغادودو أرخص من لبنان؟

أم بتسكير صروح علمية وتراثية لأنو قرابة أحد المسؤولين عم بِرَّكِبْ مشاريعو ع حساب حضارتنا؟

معكم خبر إنو 30000 ألف لبناني قدموا طلبات هجرة يالصيف تيهشلوا من إنجازاتكم؟

هل يا ترى عزموكم ع دفن تفاهم "أوعى خيك" بعد ما إختلفوا عالورثة؟

واللا خبروكم إنو مطرب هالتفاهم ضابب غراضو وفالل ع كندا بعد ما صار يآمن بالأشباح بهالبلد؟

عرفتوا إنو أحد تجار الحشيش بالبقاع خبرنا إنو كل إنتاج السهل من نبتة الكيف ما بوازي سرقة وحدة من صفقات أي وزير؟

بس الحمدالله ما طلع عنا فساد، وسجل وزارة المكافحة بعدو فاضي لأنو مسؤولينا ومدراءنا طلعوا كلهم عم يرشحوا زيت ومنكمل إنجازات لشعب ساذج، مرضع الكل بهالفرشوخين ونص اللي عندو تيطلع معهم إنو مصر بلد قذر والكوستا برافا والكرنتينا والنورموندي وبرج حمود ومكب صيدا وطرابلس وشط المتن وبعورته ووو بمثلوا جنة عدن عنا لأننا أنضف بلد!

وال 20000 شخص اللي بينصابوا بالسرطان كل سني قد ما الليطاني نضيف والمي نقية والهوا معسل ومش لازم ننسى دولة المولدات المحمية بِ مافيات السياسة واللي بِتْمَنِنْ الشعب إنها صارت غنية من ورا، ووقت بدا تعمل نكاية بالسلطة بترجعوا عالشمعة والقنديل وما لازم يغفل عنا تربيح الجميلة بتأمين الفيول للكهربا بعد ما ولعوا اعصاب الناس بقلة ضميرهم وتأييد الزعيم بِتَقَلُباتو عالعمياني لأنو المنطق والثقافة عند البعض ماتوا وتقمصوا بالتبعية العميا والإستزلام لبلاط الزعما بعد عودة زمن الجاهلية ومنكمل عالباصات المكيفة اللي بتهرب المطلوبين لأنو بعض الأشاوس النافذين قبضوا ثمن دم الشعب وخربان بيوتو مقابيل يكزدروا الإرهابيي بالباصات المكيفة وينقلوهم لأراضي آمنة
وبطرابلس وصيدا وأزقة بيروت مطرح ما الظلم صار عم يفرش الطرقات لناس ما معها تاكل ولفقرا دمرهم غبا المسؤولين وخلاهم يخاووا الزبالة وزفت الطرقات تيضلوا طيبين
والمحلات والشركات اللي عم تشحط مش بس الموظفين إنما الزباين كمان قد ما صار عنا إزدهار بالبطالة والأنانية والمحسوبية...

بس لو حدا بخبرنا إذا، بمفهوم العولمة الجديد، صار: إقرار الموازنة والتعيينات وسفرات الدرجة الاولى البلا طعمة، ومؤتمرات القروض والمنشورين بالغربة، وتعليق النياشين وتركيب الكتل النيابية اللقيطة، وعرقلة قضايا الناس والطلات الإعلامية المبتذلة، والصريخ عالشعب المعتر وبهدلة الصحافة النازفة بالاقفال، والفوز بالانتخابات الطالبية وإقرار قانون إنتخابي قاطعوا 52% من الشعب ورجع رد نفس الطبقة السياسية، تطور وإنجاز؟

بالنهاية بحب إلفت نظركم إنو الإنجاز ببلد فاسد ما بكون الا لما منشوف مسؤولين ونواب ووزرا بالحبس، ولما بصير في عنا سواح تعبي المطار ومش نازحين رايحين جايين من خلالو، ولما بيرجع عالقليلة 1% من المغتربين ليعيشوا ببلدهم، ولما بصير في كهربا وماي نضيفة وبحر أزرق وسما صافية، ولما ببلش راس المسؤولين يفرز بعد ما يفرزوا الزبالة عنا، ولما بتختفي عجقة السير وبصير عنا مترو وبترجع الشباب تتزوج وبتخف العنوسة، ولما ببطل الانسان عنا يبيع صوتو وكرامتو تيرجع ينتخب نفس الفاسدين او يحصل ع خدمة منهم، ولما بتنزل البطالة من 52% ل 1%، ولما منبطل نْسَكِرْ مصانع بالعشرات لأنها بتلوث البيئة ولما منبلش نفكر ننتسب لمواطنية صادقة قبل ما نتمسك بالطائفية والخزماتشية العميا...

بتلومونا ليه منحلم بالهجرة والقبر؟

لأنو برا وفوق في عدل بينما عندكم وع إيديكم ما في إلا ظلم ودم وإجرام وفساد وطائفية... هونيك عدالة الغربة والسما أرحم من قلوبكم الميتة بالبطش لتجمعوا ثروات ما رح تنفعكم بيوم الحساب.

هلقد بحبك يا لبنان

مقالات مشابهة

كتائب القسام: الفصائل الفلسطينية في حالة تشاور جدي لتوسيع دائرة النار

ضاهر يبشّر الزحليين الكهرباء باقية ٢٤/٢٤... وكفى الناس تضليلاً!

وسائل إعلام إسرائيلية: الجيش الإسرائيلي يستدعي جنود الاحتياط والحكومة ترفض طلباً مصرياً لوقف إطلاق النار

غارة إسرائيلية تستهدف مبنى للأمن الفلسطيني في مدينة غزة وتدمره بالكامل

مصر تبلغ إسرائيل بضرورة الالتزام بمسار التهدئة

اليكم البنود التي أقرت في الجلسة التشريعية المسائية

وفا: عباس يجري اتصالات لوقف العدوان الإسرائيلي على قطاع غزة

تجدد القصف الإسرائيلي على قطاع غزة

وسائل اعلام إسرائيلية: ارتفاع حصيلة الجرحى الإسرائيليين إلى 54 جراء قصف مستوطنات غلاف غزة